Sot mbahet seanca e parë për rastin “Banjskë” – Tre të akuzuar përballen me drejtësinë në Prishtinë

Sot në Gjykatën Themelore në Prishtinë mbahet seanca e parë gjyqësore ndaj tre të akuzuarve për përfshirje në sulmin e armatosur në Banjskë të Zveçanit, që ndodhi në shtator të vitit 2023. Para trupit gjykues do të dalin Vlladimir Tolliq, Bllagoje Spasojeviq dhe Dushan Maksimoviq.

Të tre të akuzuarit u arrestuan pas sulmit ku mbeti i vrarë rreshteri i Policisë së Kosovës, Afrim Bunjaku, dhe u vranë gjithashtu tre nga sulmuesit serbë në shkëmbim zjarri.

Rasti është pjesë e një aktakuze të gjerë të ngritur nga Prokuroria Speciale e Kosovës në shtator të vitit 2024, e cila ngarkon 45 persona me vepra penale të rënda si terrorizëm, financim të terrorizmit dhe veprime kundër rendit kushtetues dhe sigurisë së Kosovës. Në mesin e të akuzuarve është edhe Millan Radoiçiq, i cili publikisht mori përgjegjësinë për sulmin, por që aktualisht ndodhet në arrati, i lirë në Serbi.

Sipas Prokurorisë, të akuzuarit kanë pasur role të ndryshme brenda grupit kriminal – nga organizimi e drejtimi i sulmit, deri te financimi dhe pastrimi i parave. Aktakuza përfshin 34 dosje me prova, përfshirë video-incizime, analiza të pajisjeve elektronike, deklarata dëshmitarësh dhe përgjigje nga institucione ndërkombëtare.

Ndërkohë, Serbia mohon çdo përfshirje në këtë sulm, ndërsa presidenti serb, Aleksandar Vuçiq, e ka cilësuar ngjarjen si incident që ende po hetohet nga autoritetet e Beogradit. Sulmi është dënuar ashpër nga bashkësia ndërkombëtare, e cila ka kërkuar që përgjegjësit të vihen para drejtësisë.

Seanca e sotme pritet të hedhë dritë mbi rrjedhën e mëtejme të procesit gjyqësor që është një ndër më të rëndësishmit të pasluftës në Kosovë, për shkak të implikimeve të tij politike dhe të sigurisë.