Prokuroria Speciale ngre aktakuzë për krime lufte kundër një të dyshuari në Gjakovë

Prokuroria Speciale e Republikës së Kosovës ka ngritur aktakuzë ndaj të pandehurit D.R., i cili akuzohet për veprën penale “Krim lufte kundër popullsisë civile”, lidhur me ngjarjet e ndodhura gjatë luftës në Kosovë.

Sipas njoftimit zyrtar, hetimet kanë konstatuar se i pandehuri ka marrë pjesë në një sulm të gjerë dhe të organizuar të forcave ushtarake, policore dhe paramilitare serbe kundër popullsisë civile shqiptare, gjatë periudhës 7–10 maj 1999 në qytetin e Gjakovës. Ai akuzohet se ka vepruar në bashkëkryerje me persona të tjerë në kryerjen e këtyre krimeve.

Në aktakuzë thuhet se D.R. dyshohet për vrasjen e tre civilëve shqiptarë, të cilët më pas janë keqtrajtuar fizikisht. Po ashtu, ai akuzohet për dëbimin e dhunshëm të banorëve shqiptarë nga lagjet e tyre, si dhe për plaçkitjen dhe shkatërrimin e shtëpive në disa zona të qytetit.

Prokuroria bazohet në dëshmi të viktimave dhe dëshmitarëve okularë, identifikimin e të pandehurit përmes fotografive, raporte të Institutit të Mjekësisë Ligjore dhe prova të tjera materiale të mbledhura gjatë hetimeve.

I pandehuri ndodhet aktualisht në paraburgim, ndërsa Prokuroria ka kërkuar zgjatjen e kësaj mase, duke u thirrur në rrezikun e arratisjes.

Prokuroria Speciale ka theksuar edhe një herë përkushtimin për të hetuar dhe ndëshkuar të gjitha krimet e kryera gjatë luftës, me qëllim të sjelljes së drejtësisë për viktimat dhe ndërtimit të një shoqërie të drejtë dhe demokratike.