Kriza institucionale në Kuvendin e Kosovës: VV dështon sërish të zgjedhë Albulena Haxhiun kryetare
Seanca e Kuvendit të Kosovës e mbajtur dje ka përfunduar pa votim për zgjedhjen e kryetares së Kuvendit, pasi Lëvizja Vetëvendosje vendosi të mos e procedojë në votim kandidaturën e Albulena Haxhiut. Nënkryetari i VV-së, Glauk Konjufca, kërkoi shtyrjen e seancës për të arritur një marrëveshje me partitë e tjera politike. Seanca pritet të vazhdojë të mërkurën, më 24 prill, në orën 10:00.
Partitë opozitare, PDK dhe LDK, kanë kërkuar nga Vetëvendosje që të propozojë një emër të ri, duke e bërë të qartë se nuk do ta votojnë Albulena Haxhiun. Kryetari i PDK-së, Memli Krasniqi, deklaroi se Haxhiu është simbol i dështimeve të qeverisë dhe se kandidatura e saj vetëm sa po e thellon bllokadën institucionale.
“VV ka të drejtë të propozojë kryetarin e Kuvendit, por jo ta imponojë atë. Emri i Albulena Haxhiut ka dështuar disa herë dhe do të dështojë sërish,” tha Krasniqi, duke shtuar se zgjedhjet e reja janë një opsion real nëse nuk gjendet një zgjidhje.
Nga ana tjetër, përfaqësuesit e Vetëvendosjes, si Hekuran Murati dhe Mimoza Kusari-Lila, kanë insistuar që kandidatura për kryetar Kuvendi t’i takon partisë fituese, dhe se partitë tjera duhet të reflektojnë dhe të mbështesin propozimin e tyre.
“Emri mbetet i njëjtë. Besojmë se si për raportin e mandatimit, edhe për këtë çështje duhet të arrihet konsensus,” u shpreh Murati.
Deputetja e LDK-së, Hykmete Bajrami, ka akuzuar Vetëvendosjen se po shkel rregulloren e Kuvendit dhe po mungon vullneti për një marrëveshje politike. Sipas saj, VV-ja duhet të dëgjojë partitë e tjera dhe të propozojë një kandidat që mund të marrë mbështetje më të gjerë.
Kjo ishte tentativa e pestë për të konstituuar Kuvendin, por pa sukses. Mbledhja e radhës do të mbahet të mërkurën, ku mbetet për t’u parë nëse do të gjendet një kompromis apo vendi do të përballet me një krizë të thellë politike.
