Aksident fatal në aksin Elbasan-Librazhd, shoferi arrestohet
Policia e Elbasanit ka arrestuar shoferin e përfshirë në një aksident tragjik që ndodhi një ditë më parë në aksin Elbasan-Librazhd, ku një person humbi jetën dhe pesë të tjerë u plagosën.
Nëpërmjet një njoftimi për media, policia njoftoi se është arrestuar shtetasi N. D., 32 vjeç, i cili drejtonte automjetin që përplasi makinën e drejtuar nga shtetasi A. F., 66 vjeç. Si pasojë e përplasjes, pasagjeri në automjetin e drejtuar nga A. F., shtetasi F. A., 68 vjeç, humbi jetën. Po ashtu, u dëmtuan drejtuesit e dy automjeteve dhe tre pasagjerë të tjerë, të cilët ndodhen në spital për ndihmë mjekësore.
Policia ka nisur hetimet për shkaqet e aksidentit dhe po vazhdon procedurat ligjore ndaj shtetasit N. D. për veprën penale të “Shkeljes së rregullave të qarkullimit”.
