KMShK shqetësohet për mosakreditimin e disa mediave nga KQZ
Këshilli i Mediave të Shkruara të Kosovës (KMShK) ka shprehur shqetësimin e tij lidhur me vendimin e Komisionit Qendror të Zgjedhjeve (KQZ) për mosakreditimin e ekipeve të disa mediave gjatë zgjedhjeve të 12 tetorit.
Sipas KMShK-së, vendimi përfshin media në gjuhën shqipe dhe serbe, duke e cilësuar këtë akt si të papranueshëm dhe të dëmshëm për lirinë e medias dhe për sigurimin e informimit të drejtë dhe transparent të qytetarëve në ditën e zgjedhjeve.
“Këto media anëtare të KMShK-së i plotësojnë të gjitha kriteret e kërkuara për veprimtari mediale”, thekson këshilli në reagimin e tij.
KMShK i bën thirrje Panelit Zgjedhor për Ankesa dhe Parashtresa (PZAP) që të shqyrtojë çështjen dhe të marrë vendim meritor, për të garantuar trajtim të barabartë për të gjitha mediat.
