Stuhi në Zvërnec, dy turistë ukrainas bllokohen nga një pemë e rrëzuar

Reshjet e dendura të shiut, të shoqëruara me erë të fortë, kanë shkaktuar shqetësime në zonën e Zvërnecit, ku dy turistë nga Ukraina mbetën të bllokuar nga një pemë e rrëzuar.

Ngjarja ndodhi rreth orës 13:00, kur era e fortë shkatërroi pemën dhe bllokoi një rrugë rurale, duke dëmtuar edhe segmentin për këmbësorë. Çifti ukrainas kërkoi ndihmën e zjarrfikësve të Vlorës, të cilët ndërhynë menjëherë për të hapur rrugën dhe për të prerë pemën.

Përveç automjetit të turistëve, disa makina të tjera mbetën të bllokuara, por fatmirësisht nuk raportohet për të lënduar.

Zyra e emergjencave paralajmëron qytetarët për kujdes gjatë lëvizjes në rrugët rurale dhe urbane, duke respektuar sinjalistikën dhe udhëzimet e autoriteteve.