Prishtina gati për fillimin e vitit të ri shkollor, 7 shkolla tjera me mësim gjithëditor
Të hënën nis viti i ri shkollor 2025/2026, ndërsa Komuna e Prishtinës ka bërë të ditur se është plotësisht e përgatitur për fillimin e këtij procesi.
Drejtori i Arsimit në Komunën e Prishtinës, Samir Shahini, tha se janë përmbyllur me sukses ndërhyrjet nëpër shkolla, është realizuar rekrutimi i mësimdhënësve si dhe pranimi i fëmijëve në çerdhe e kopshte.
Nga ky vit shkollor, mësimi gjithëditor do të zbatohet edhe në shtatë shkolla të tjera të kryeqytetit, pesë prej të cilave ndodhen në zonat rurale. Shahini theksoi se ky model i mësimdhënies ka ndikuar pozitivisht edhe në përmirësimin e ekonomive familjare.
Sipas tij, orari i mësimit tërëditor për klasat 1 dhe 2 do të zgjasë deri në orën 14:30, ndërsa për klasat 3 deri në 5 deri në 15:30. Ai apeloi për hartimin urgjent të një udhëzimi administrativ që do të mundësonte buxhetimin e programit, në mënyrë që të shtrihet në të gjitha shkollat e vendit.
Ndërkohë, edhe këtë vit, tekstet dhe materialet shkollore për nxënësit nga klasa e parë deri në të nëntën do të financohen nga Qeveria e Kosovës. Ashtu si vitin e kaluar, mjetet për blerjen e librave janë transferuar drejtpërdrejt në llogaritë bankare të prindërve.
Por, drejtori Shahini e ka cilësuar këtë metodë si të gabuar dhe të dëmshme, duke kujtuar se më herët librat për nxënësit nga klasa 1 deri në 9 shpërndaheshin falas nga shkollat.
