Kryeministrja e Tajlandës shkarkohet nga Gjykata Kushtetuese pas telefonatës me Hun Sen
Gjykata Kushtetuese e Tajlandës ka shkarkuar nga detyra kryeministren Paetongtarn Shinawatra, duke thelluar krizën politike në vend dhe duke goditur fuqishëm dinastinë politike Shinawatra.
Vendimi u mor të premten, pasi gjashtë nga nëntë gjyqtarët votuan pro shkarkimit, duke argumentuar se veprimet e saj kishin shkelur standardet etike të detyrës. Shkarkimi erdhi pas publikimit të një telefonate në qershor, ku Paetongtarn i referohej ish-kryeministrit kamboxhian Hun Sen si “xhaxha” dhe kritikonte ushtrinë tajlandeze, në një periudhë tensioni të madh në kufirin me Kamboxhian.
Gjykata theksoi se marrëdhënia e saj personale me Hun Sen “dukej në linjë me interesat e Kamboxhias” dhe se telefonata ngjalli dyshime nëse ajo po vepronte në interes të Tajlandës. Paetongtarn, e cila pranoi vendimin, tha se veprimet e saj kishin synuar të shpëtonin jetë njerëzish.
Telefonata e saj erdhi pak para shpërthimit të një konflikti pesëditor mes dy vendeve, ku dhjetëra persona humbën jetën dhe qindra mijëra u detyruan të largoheshin nga shtëpitë.
Paetongtarn, 39 vjeçe dhe vajza e ish-kryeministrit Thaksin Shinawatra, iu bashkua politikës vetëm në vitin 2021 dhe mori postin pas shkarkimit të paraardhësit të saj, Srettha Thavisin. Ajo është kryeministrja e pestë e rrëzuar nga Gjykata Kushtetuese që prej vitit 2008.
Tashmë, parlamenti tajlandez pritet të zgjedhë një pasues mes pesë kandidatëve të regjistruar, ndërsa partia e saj Pheu Thai ka mbetur me një shumicë të brishtë pas tërheqjes së mbështetjes nga partneri i koalicionit, partia konservatore Bhumjaithai.
