Afati për regjistrimin e votuesve jashtë Kosovës përfundon sonte

Afati 38-ditor për regjistrimin e votuesve jashtë Kosovës për votim me postë në zgjedhjet e 12 tetorit përfundon sonte në ora 23:59.

Deri më tani, Komisioni Qendror i Zgjedhjeve (KQZ) ka aprovuar 36,299 kërkesa për regjistrim për votim me postë. Nga data 23 korrik deri më 29 gusht 2025, përmes platformës elektronike https://diaspora.kqz-ks.org
janë pranuar gjithsej 44,707 aplikime, prej të cilave 7,945 janë refuzuar, njoftoi zëdhënësi i KQZ-së, Valmir Elezi.

Sipas të dhënave të KQZ-së, komunat me numrin më të madh të votuesve të regjistruar nga jashtë Kosovës janë: Suhareka (2,759), Gjakova (2,697), Deçani (2,078) dhe Klina (2,009).

Ndërkaq, sa i përket shteteve, Gjermania me 17,131 dhe Zvicra me 8,862 janë vendet me numrin më të madh të votuesve të regjistruar për votim me postë nga diaspora kosovare.

KQZ-ja u bën thirrje qytetarëve që të sigurohen që aplikimet e tyre të jenë të kompletuara përpara përfundimit të afatit sonte.