Arrestohet pilot kroat dhe partnere e tij nga Kosova, dyshohen për spiunazh mbi lëvizjet e KFOR-it
Një pilot kroat dhe partnerja e tij nga Kosova, e identifikuar me inicialet A.M., janë arrestuar në Kroaci nën dyshimin se kanë shpërndarë informacione të ndjeshme që lidhen me lëvizjet e serbëve në veri të Kosovës, si dhe me pozicionet e trupave të KFOR-it.
Sipas raportimeve, çifti dyshohet për lidhje me shërbimet e inteligjencës serbe. Nga KFOR-i janë shprehur se “i marrin shumë seriozisht këto pretendime”, duke theksuar se siguria e trupave dhe mbrojtja e të dhënave të klasifikuara janë prioritet.
A.M., e cila më parë ka punuar si përkthyese në EULEX, është vendosur në paraburgim me arsyetimin se ekziston rreziku i arratisjes dhe ndikimit mbi dëshmitarët. Ndërkohë, piloti kroat nuk është dërguar në paraburgim pasi gjykata vlerësoi se nuk ka më mundësi për përsëritje të veprës, duke qenë se nuk është më pjesë e misionit në Kosovë.
Historia e çiftit nis që nga viti 2016, kur ai shërbente në kontingjentin kroat të KFOR-it, ndërsa ajo punonte për EULEX-in. Marrëdhënia e tyre ka qenë e gjatë me ndërprerje, ndërsa A.M. shpesh udhëtonte drejt Kroacisë, ku edhe u arrestua së fundmi.
Prokuroria kroate akuzon pilotin për zbulim të sekreteve ushtarake, vepër që parashikon deri në 10 vjet burg, ndërsa për A.M. dënimi varion nga një deri në pesë vjet. Sipas akuzës, informacionet janë transmetuar përmes aplikacioneve të koduara.
Në mbrojtjen e tij, piloti ka mohuar akuzat, duke deklaruar se partnerja i dërgonte vetëm të dhëna mbi kushtet e motit të nevojshme për fluturimet. “Dikush po më bën padrejtësi, ajo është vetëm një viktimë kolaterale,” është shprehur ai.
Qeveria e Kosovës ka deklaruar gatishmërinë për të bashkëpunuar me autoritetet kroate në zbardhjen e plotë të rastit, ndërsa nga EULEX-i është konfirmuar se janë në dijeni për përfshirjen e një ish-punëtoreje të tyre në hetime.
