Vuçiq barazon zhvillimet në Kosovë me ato në Bosnje: “Po përgatitet skenar i ngjashëm”
Presidenti i Serbisë, Aleksandar Vuçiq, ka vazhduar me retorikën e tij politike duke barazuar zhvillimet e fundit në Kosovë me situatën në Bosnje dhe Hercegovinë, duke përdorur si pikë referimi serbët që jetojnë në këto dy shtete.
Në një intervistë për televizionin serb Pink, Vuçiq komentoi vendimin e Komisionit Qendror të Zgjedhjeve të Bosnje dhe Hercegovinës (CIK BeH) për mbajtjen e zgjedhjeve të jashtëzakonshme për presidentin e Republikës Sërpska (RS), të caktuara për 23 nëntor.
Duke iu referuar deklaratës së kryetares së CIK-ut, Irena Hadziabdiq, e cila theksoi se në këto zgjedhje “mund të ndodhë që votuesit nga Federata e BeH të ndikojnë në rezultat”, Vuçiq e quajti këtë “një deklaratë shumë të rrezikshme” dhe shtoi se “po përgatitet një skenar i ngjashëm me atë në veri të Kosovës”.
“Njerëzit po luajnë me zjarrin, duke mos kuptuar se nuk është koha për të përdorur forcën e të tjerëve për të realizuar interesat e tyre politike,” deklaroi Vuçiq, duke akuzuar aktorë të jashtëm për ndërhyrje në çështjet që lidhen me serbët në rajon.
Ai nuk la pa komentuar edhe situatën në Kosovë, duke akuzuar kryeministrin Albin Kurti se po tenton të ndalojë Listën Serbe nga pjesëmarrja në zgjedhje dhe se po shtyn përpara kandidaturën e Rada Trajkoviqit për postin e nënkryetarit të Kuvendit. Sipas tij, ky post i takon përfaqësuesit të Listës Serbe, Igor Simiq.
“Do ta përballojmë këtë situatë, do të mbijetojmë, do të ruajmë paqen dhe stabilitetin, edhe pse nuk do të jetë aspak e lehtë,” tha Vuçiq, duke theksuar se “për paqe dhe stabilitet nevojiten dy palë”, por Serbia “do të bëjë gjithçka që është në dorën e saj për ta ruajtur atë”.
Zgjedhjet e jashtëzakonshme në RS u shpallën pas vendimit të Gjykatës së Apelit të Bosnje dhe Hercegovinës për të dënuar presidentin aktual, Milorad Dodik, me një vit burg dhe gjashtë vjet ndalim të veprimtarisë politike, çka çoi në heqjen e mandatit të tij nga CIK-u dhe shpalljen e zgjedhjeve të reja më 23 nëntor.
