Southwest Airlines detyron pasagjerët obezë të blejnë dy ulëse
Southwest Airlines, një nga linjat më të mëdha amerikane të fluturimit, ka njoftuar një ndryshim të madh në politikën e saj për pasagjerët mbipeshë. Duke filluar nga 27 janari 2026, udhëtarët që nuk mund të ulen rehat midis mbështetëseve të krahëve të vendit të tyre, do të duhet të blejnë paraprakisht një vend shtesë.
Derisa më parë ata mund të merrnin një vend të dytë falas në aeroport ose të kërkonin rimbursim, tani kjo nuk do të garantohet më. Rimbursimet do të varen nga disponueshmëria e vendeve dhe rezervimi duhet të bëhet në të njëjtën klasë brenda 90 ditëve.
Vendimi ka shkaktuar reagime të forta nga komuniteti i udhëtarëve mbipeshë. Jason Vaughn, agjent udhëtimesh dhe krijues i faqes Fat Travel Tested, tha se politika e mëparshme siguronte një përvojë më të rehatshme për të gjithë pasagjerët dhe ndryshimi do të “përkeqësojë përvojën e fluturimit”.
Southwest bëhet kështu linja ajrore e parë e madhe amerikane që e bën të detyrueshme blerjen e një vendi të dytë për ata që nuk ulen rehat, një rregull që pritet të shkaktojë debate në muajt e ardhshëm.
