Radoniqi pret të dërguarin special të Francës, diskutohet përgatitja e zgjedhjeve lokale në Kosovë
Kryesuesi i Komisionit Qendror të Zgjedhjeve (KQZ), Kreshnik Radoniqi, ka pritur të enjten në takim të dërguarin special të Francës për Ballkanin Perëndimor, René Troccaz.
Sipas njoftimit të KQZ-së, Troccaz shoqërohej nga Gabrielle Juve, redaktore për Kosovën në Ministrinë e Jashtme të Francës, si dhe nga ambasadori francez në Kosovë, Olivier Guérot.
Në takim, Radoniqi informoi përfaqësuesit francezë mbi përgatitjet që KQZ po bën për organizimin e zgjedhjeve lokale të 12 tetorit. Ai theksoi hapat konkretë që institucioni ka ndërmarrë dhe aktivitetet që po zhvillohen, duke garantuar përkushtimin e KQZ-së për një proces zgjedhor të lirë, të drejtë dhe transparent.
“Ishte nënvizuar rëndësia e bashkëpunimit me partnerët ndërkombëtarë në ruajtjen dhe avancimin e standardeve demokratike në Kosovë”, thuhet në njoftim.
Nga ana e tij, i dërguari special francez, René Troccaz, vlerësoi punën e KQZ-së si institucion i pavarur dhe i uroi sukses në organizimin e zgjedhjeve të lira dhe demokratike në vend.
