Vala e re e të nxehtit rikthehet – temperaturat kapin deri në 39°C

Kosova pritet të përfshihet nga një valë e re e të nxehtit duke filluar nga dita e premte, ku moti do të jetë kryesisht me diell dhe më i nxehtë.

Sipas “Mendimi për Motin”, të premten parashihet mot i kthjellët me erë të lehtë dhe mesatare nga drejtimi verilindor, me shpejtësi prej 3 deri në 8 metra në sekondë. Temperaturat minimale do të zbresin në 14 deri 17°C, ndërsa ato maksimale do të ngjiten në 32 deri 35°C.

Gjatë fundjavës dhe ditëve të para të javës së ardhshme, moti shumë i nxehtë do të vazhdojë, duke shënuar kështu fillimin e një vale të re të të nxehtit. Temperaturat maksimale pritet të arrijnë nga 35 deri në 36°C, ndërsa në disa zona të izoluara edhe deri në 37 apo 39°C. Temperaturat minimale do të luhaten mes 14 dhe 18°C.

Era do të fryjë kryesisht nga verilindja, me intensitet të lehtë dhe mesatar prej 4 deri në 11 metra në sekondë.

Meteorologët këshillojnë kujdes për shkak të temperaturave të larta dhe rekomandojnë qëndrimin në ambiente të freskëta, sidomos gjatë orëve të pikut të vapës.