Skandal i ri korrupsioni në Ukrainë, lidhur me prokurimin e armëve
Në Ukrainë është zbuluar një skandal i ri i korrupsionit që lidhet me prokurimin e armëve, veçanërisht të dronëve për nevojat e luftës. Byroja Kombëtare Kundër Korrupsionit (NABU) dhe Zyra e Prokurorit Kundër Korrupsionit (SAP) njoftuan për një “përvetësim sistematik” të fondeve publike dhe marrje të përfitimeve të paligjshme në shkallë të madhe.
Sipas hetimeve, kontratat për blerjen e dronëve janë lidhur me çmime shumë më të larta sesa vlera reale, duke dëmtuar buxhetin shtetëror. Katër persona janë arrestuar, përfshirë deputetin Oleksiy Kuznetsov, anëtar i partisë së presidentit Volodymyr Zelenski. Akuzat përfshijnë edhe punonjës të shërbimeve publike dhe anëtarë të Gardës Kombëtare, të cilët janë pezulluar nga detyrat.
Të dyshuarit akuzohen se kanë marrë rreth 30% ryshfet nga shumat e kontratave për dronët. Presidenti Zelenski falënderoi organet antikorrupsion dhe theksoi nevojën për bashkëpunim të qartë dhe vendime të drejta për denimin e korrupsionit.
Ligji i fundit i miratuar nga parlamenti ukrainas rivendosi pavarësinë e NABU dhe Zyrës së Prokurorit Kundër Korrupsionit, duke i larguar ato nga juridiksioni i Zyrës së Prokurorit të Shtetit, një veprim që kishte shkaktuar protesta dhe kritika nga Bashkimi Evropian.
Korrupsioni mbetet një problem i rëndësishëm në Ukrainë, sidomos në kontekstin e luftës dhe ndihmave ndërkombëtare. Në Indeksin e Perceptimit të Korrupsionit të Transparency International, Ukraina renditet në vendin e 105-të nga 180 vende.
