Thatësira rekord godet Europën Lindore dhe Mesdheun
Europa dhe rajoni i Mesdheut janë përballur muajin e kaluar me një valë të thatësirës më të madhe të regjistruar ndonjëherë që nga fillimi i matjeve në vitin 2012. Sipas të dhënave më të fundit të Observatorit Europian të Thatësirave (EDO), më shumë se gjysma e sipërfaqes tokësore në vendet europiane ishte e prekur nga thatësira në fillim të korrikut.
Nga 1 deri më 10 korrik, përqindja e tokës së prekur ishte 21 përqind mbi mesataren e viteve 2012–2014, duke shënuar kështu nivelin më të lartë të thatësirës në këtë periudhë. Edhe pse krahasuar me muajin qershor ka një rënie të lehtë – nga 55,5% në pak më pak – situata mbetet shqetësuese në shumë vende.
Sipas vëzhgimeve satelitore të programit Copernicus, analiza e thatësirës bazohet në tre parametra kyç: sasinë e reshjeve, lagështinë e tokës dhe gjendjen e vegjetacionit.
Vendet më të prekura janë ato të Europës Lindore. Në Serbi, Bullgari dhe Kosovë, thuajse e gjithë sipërfaqja tokësore është ndikuar nga thatësira. Situata është po ashtu kritike në Armeni dhe Turqi, ku nga 77 deri në 95 përqind e territorit po përballet me mungesë të theksuar të lagështirës. Në Turqi, thatësira është shoqëruar edhe me erëra të forta, të cilat kanë nxitur shpërthimin e zjarreve.
Ndërkohë, Siria përballet me pasoja të rënda humanitare, pasi thatësira po kërcënon të korrat e grurit. Kombet e Bashkuara paralajmërojnë se 16 milionë njerëz në vend janë në rrezik për sigurinë ushqimore.
Në Europën Perëndimore, ndikimi i thatësirës ka qenë më i ndryshueshëm. Rreth një e treta e territorit të Francës është prekur, ndërsa Spanja dhe Portugalia janë përballur me ndikim të kufizuar.
Situata e krijuar nënvizon nevojën për strategji afatgjata për menaxhimin e burimeve ujore dhe përballjen me efektet e ndryshimeve klimatike në kontinent.
