Shtatë kandidatë në garë për tre pozita gjyqtari në Gjykatën Supreme të Kosovës

Këshilli Gjyqësor i Kosovës (KGJK) ka publikuar listën me shtatë kandidatë që kanë kaluar fazën e verifikimit dhe janë kualifikuar për të garuar për tri pozita të gjyqtarit në Gjykatën Supreme të Kosovës.

Kandidatët që synojnë këto pozita janë:

Faton Ademi

Faton Bajrami

Halide Reka

Nora Ballaca-Dula

Qerim Ademaj

Rafet Haxhaj

Ramush Bardiqi

Sipas KGJK-së, shumica e kandidatëve aktualisht ushtrojnë funksione gjyqësore. Gjyqtari Qerim Ademaj, i cili deri në janar të vitit 2025 ishte anëtar i KGJK-së, aktualisht shërben në Gjykatën e Apelit. Po ashtu, Ademi, Reka, Ballaca-Dula dhe Haxhaj janë gjyqtarë në Gjykatën e Apelit, ndërsa Bardiqi dhe Bajrami janë gjyqtarë në Gjykatën Komerciale – Dhomat e Shkallës së Dytë.

Konkursi për këto tri pozita u shpall gjatë mbledhjes së 347-të të KGJK-së, më 28 maj 2025. Dy nga këto pozita do t’i përkasin Panelit Ankues të Agjencisë Kosovare të Pronës, që funksionon në kuadër të Gjykatës Supreme.

Të shtatë kandidatët, pasi kanë plotësuar kriteret ligjore, pritet të intervistohen më 22 korrik 2025. KGJK ka ftuar institucionet dhe organizatat relevante për të monitoruar këtë proces, duke theksuar përkushtimin e saj ndaj meritokracisë, transparencës, barazisë dhe objektivitetit.

Paneli për intervistimin, vlerësimin dhe rekomandimin e kandidatëve përbëhet nga:

Fejzullah Rexhepi – Kryetar i Gjykatës Supreme të Kosovës / Kryetar i Komisionit

Albert Zogaj – Kryesues i KGJK-së / Anëtar i Komisionit

Teuta Ibrahimi – Anëtare e KGJK-së / Anëtare e Komisionit

Vilard Bytyqi – Anëtar i KGJK-së / Anëtar i Komisionit

Nenad Laziq – Gjyqtar në Gjykatën Supreme / Anëtar i Komisionit

Drita Rexhaj – Anëtare e KGJK-së / Anëtare rezervë

Zenel Leku – Gjyqtar në Gjykatën Supreme / Anëtar rezervë

Procesi pritet të përmbyllet me rekomandimin e tre kandidatëve më të suksesshëm, të cilët më pas do të emërohen në pozitën e gjyqtarit në Gjykatën Supreme.