Kosova ndan 580 mijë euro për ndërtimin e shkollës së muzikës dhe muzeut në Preshevë

Qeveria në detyrë e Kosovës ka ndarë mbi gjysmë milioni euro për bashkëfinancimin e ndërtimit të një shkolle muzike dhe një muzeu në Preshevë, komunë me shumicë shqiptare në jug të Serbisë. Vendimi u mor gjatë mbledhjes së kabinetit qeveritar të mërkurën, me propozim të ministrit në detyrë të Kulturës, Hajrulla Çeku.

Sipas ministrit Çeku, vendimi erdhi pas kërkesës së Komunës së Preshevës dhe është në përputhje me marrëveshjen mes Qeverisë së Kosovës dhe Këshillit Kombëtar Shqiptar në Luginën e Preshevës. Ai theksoi se fondi prej 580 mijë eurosh përfaqëson një nga investimet më të rëndësishme kulturore për shqiptarët në këtë rajon.

Qeveria e Kosovës ka mbështetur deri tani 28 projekte kulturore përmes Këshillit Kombëtar Shqiptar dhe 21 të tjera përmes Ministrisë së Kulturës, që përfshijnë edhe komunat Bujanoc dhe Medvegjë.

Më 27 qershor, Kosova kishte ndarë gjithashtu 626.400 euro për mbështetje në arsim dhe lobim institucional për shqiptarët në tri komunat me shumicë shqiptare në Serbi, duke përfshirë bursa për studentë, ndihmë për nxënës dhe fonde për aktivitete ndërkombëtare avokuese.

Ndërkohë, në tetor të vitit të kaluar, zëvendëskryeministri Besnik Bislimi akuzoi Serbinë për pengim të mbështetjes financiare të Kosovës për bujqit shqiptarë në Luginë. Kjo pas reagimit të autoriteteve serbe që kërkuan anulimin e një thirrjeje për subvencione bujqësore të financuara nga Kosova.

Serbia nuk e njeh pavarësinë e Kosovës dhe e konsideron atë si pjesë të territorit të saj, ndërkohë që vazhdon të financojë institucionet në zonat me shumicë serbe në Kosovë. Institucionet e tjera paralele serbe janë mbyllur nga autoritetet kosovare gjatë vitit 2024.