Nis Marshi i Paqes në Bosnje, në përkujtim të viktimave të gjenocidit në Srebrenicë
Mijëra qytetarë nga e gjithë bota kanë nisur të martën Marshin e Paqes në Bosnje e Hercegovinë, në kujtim të viktimave të gjenocidit në Srebrenicë.
Ky marsh përkujtimor treditor, i cili përshkon një rrugë prej rreth 110 kilometrash nga fshati Nezuk afër Tuzllës deri në Qendrën Përkujtimore në Potoçari, ndjek gjurmët e mijëra civilëve të Srebrenicës që në korrikun e vitit 1995 u përpoqën të shpëtonin nga forcat serbe të Bosnjës.
Marshi përmbyllet më 11 korrik, në përvjetorin e 30-të të masakrës, kur në Potoçari do të bëhet edhe varrosja e mbetjeve mortore të shtatë viktimave që janë identifikuar gjatë vitit të fundit.
Më 11 korrik 1995, forcat serbe pushtuan Srebrenicën, zonë e shpallur e sigurt nga Kombet e Bashkuara, dhe brenda pak ditësh vranë mbi 8.000 burra dhe djem boshnjakë. Trupat e viktimave u hodhën në gropa masive në pyjet përreth. Ky krim është njohur ndërkombëtarisht si gjenocid nga Gjykata e Hagës.
Në tri dekadat e fundit, mbi 50 persona janë dënuar me gjithsej rreth 780 vjet burg për gjenocid dhe krime të tjera të kryera në Srebrenicë. Ndër më të dënuarit janë Radovan Karaxhiq dhe Ratko Mlladiq, përkatësisht president dhe komandant i ushtrisë së Republikës Sërpska gjatë luftës, të cilët u dënuan me burgim të përjetshëm.
Marshi i Paqes organizohet që nga viti 2005 dhe synon të ruajë gjallë kujtimin për viktimat e gjenocidit, ndërsa vit pas viti po njeh një rritje të vazhdueshme të pjesëmarrjes.
